政情:高永文呻分子料理唔飽

食物及衞生局局長高永文一向鍾意家鄉潮州菜,尋日佢出席科學廚神挑戰比賽頒獎禮時,見到一班中學生炮製分子料理,諗到一段趣事。話說佢曾經喺一間知名餐廳食咗一味分子料理梅菜扣肉,既然係分子料理,當然係冇肉食啦,所以高永文笑稱,結果都唔飽肚。

高永文(中)試食學生炮製嘅分子料理四重奏。(蘇家欣攝)

鍾情家鄉潮州菜

參加烹飪比賽嘅都係初中學生,其中有學生炮製「分子料理四重奏」,用多款水果加入海藻等配料,製成類似三文魚籽、雞蛋黃等甜品。高永文對一個用杧果汁製成嘅雞蛋黃特別感興趣,大讚整得好似真蛋黃,仲邊食邊讚同學們嘅分子料理符合政府依家推廣低鹽低糖原則。

雖然同學們煮嘅菜式味道唔錯,但高永文始終最愛潮州菜。佢透露,平日得閒都會入廚煮番幾味,希望傳統菜式唔會因為冇人學而失傳。