[剪報] 英國型仔廚神Jamie Oliver以教育兒童認識健康飲食為己任,更創立餐廳Fifteen讓基層年輕人大展所長。香港也有一個靚仔代表,仿效廚神以廚藝知識貢獻下一代。何國駿(Andy)25歲便成為五星級酒店西餐廳的三廚,公餘時走到社區中心開班授徒教煮餸,對象是一班被社會遺忘的隱蔽青年。

父親兩舅父皆為廚師

「番茄煎到有色就要上碟,配菜要逐樣用手放上碟排好,唔好堆上去就算。」簡簡單單的西式早餐,要煮得色香俱全並不容易。靠煮藝,也要靠心思。

樣子俊俏、穿着潔白廚師服的Andy,以響亮聲線逐點提示,在場學員個個聽得入神,並按照指示試做。食物的香味,令一班少男冰冷的心漸漸溶化,展露久違的笑容。

由無人生目標,到在西廚界嶄露頭角,是命運,也靠努力。Andy16歲中學畢業,成績一般,於是選擇實用科目。來自廚師世家,爸爸和兩位舅父也分別從事中、西廚,自小嘗盡美食,曾到廚房下廚,發現對煮食有興趣,遂報讀西廚課程。

17歲膽粗粗入行,在蘭桂坊一家西餐廳任學徒,由洗廚房做起。他坦言,最初甚麼也不懂,不時撞板換來責罵,「做錯嘢會俾人鬧,甚至講粗口,好難受,但要話畀自己聽唔好放棄,諗辦法做好」,漸漸犯錯越來越少,更越做越好。

默默耕耘八年,終做出成績,現在他是香港一著名五星級酒店餐廳的三廚,煮食、出餐以至核數管理都要做。一般要30多歲才可爬至現時職位,他比別人早了一大截。這麼快上位,有甚麼秘訣?爽朗的Andy不加思索說:「勤力囉!」獲老闆賞識,來年他更可能被調派到法國深造廚藝。

炮製美食佔據Andy大部份時間,半年前卻因緣際會,跑到基督教服務處當起烹飪導師。他在社區中心遇到一群處於隱蔽狀態的少男,感觸良多,決定利用公餘時間,以飲食和廚藝喚醒他們。「15至30歲係人生嘅黃金時間,應該為理想打拼,唔應該浪費時間,見到佢哋咁,令我有一份使命感,希望幫吓佢哋」。

最開心徒弟們露笑容

Andy從「老本行」入手,「人人都要食嘢,試吓教佢哋煮嘢食,用食物幫佢哋脫離隱蔽世界」。他細心設計烹飪課餐單,簡單至漢堡包,實用有Carbonara意粉,以至充滿浪漫情調的冧酒朱古力都有,務求容易上手,引起學員興趣。

努力了大半年終得回報。「佢哋由唔出聲,到肯應吓你,到最後臉上終掛起笑容」。天天忙得不可開交的Andy,沒時間追女仔,卻教出30多個徒弟,有五個更因此主動報讀正規廚藝課程,不再隱蔽。Andy能將烹調食物提升到更高層次,改變別人人生,也為自己帶來意想不到的滿足感。

資料來源:蘋果日報 記者梁御和